غلطان بعتذر

الاعتذار.. هو أجمل عبارة.. بعد راحة البال مُباشرةً.. وهي تشبه جيتك عطشان جداً جداً.. من حَرٍ شديدٍ.. تلقى موية باااردة تشربها تبرِّد جوفك.. (الجوف) تحديداً.

وهو ما عنده نوعٌ.. مَرَا واللا راجل.. ولا تتدخّل الكرامة في بنوده.. هو فعلٌ قام به آخر في حقّك فَوَجَبَ عليه العُذر دُون تأخير.. وبدون ما تفكِّر الزول دا حيقبل عُذرك ولا لا.. فالعُذر لما يحصل الموضوع انتهى.

وبي كدا نعتبر الغلطة انتهت بمراسم دفنها في مَقبرة التسامُح والاعتذار بنداً من بنود الأسف.. وهي العبارة التي بعدها لا ينضم خشمٌ.. وهي تصحبها طوالي.. قبلت عُذرك.

والاعتذار من شيم الفُضلاء.. بتعريف أقرب هو من مجموعة النفس اللوّامة بقيادة المايسترو الضمير.

فأنا آسف عبارة ليست علاقة بالمنصب أو السُّلطة أو المال.. فهي من العبارات التي تقول بعدها.. خلاص حَصَلَ خير.. وامكن خيرين وأكتر.

بعتذر ليك شديد قد تدخل فيها بنود أكتر حِنِيّة.. حقك عليّ.. وأعفي لي.. والله ما قاصد.. ومعليش أكترها حِنِيّة ودارجية وأوسعها تعامُلاً.. امسحها لي في وشي.. دي تحديداً لو زول حكى ليك شكلة مع زول تربطك بينهم الاتنين علاقة وإنت عارف طيبة الزول دا قدر كيف وممكن نقول عليها عُذر بالإنابة وبطيبة خاطر وسماحة وش..

العذر للبفهم فهو ثقافة انسانية 100%.

تحت قاعدة كل ليل بعده صباح.. كل عُذر أو خراب وش بعده.. أنا آسف بمسكة يد حصل صافية لبن وحليب يا قشطة..

في ناس بقولوا ما بنعتذر العُذر.. ضُعف.. سبحان الله.

في ناس بتعتذر بطرق مُختلفة.. هدية.. ابتسامة كبيرة.. طرق بتعرفها إنت وهم.. وديل لو إنت بتحبهم بتقبل طريقتهم لأنك عارف قلبهم أبيض.

الاعتذار.. قد يدخل فيهو الزول باقي عليك وما داير العلاقة تنتهي وبكدا بقبله.. بينما على الصعيد الآخر في ناس بترفض العذر وبتعتبره لحدي هنا كفاية.

العذر من الحاجات البتخلي الناس مُتصالحين مع روحهم.. عُمره العذر ما بخلِّي الزول صغير.. هو بَخلِّي الزول كَبير قدام روحه والخلق لأنو الاعتراف بالذنب فضيلة.

الناس بتغلط.. ما بشر.. وما عيب عليك لو غلطت تعتذر.. لكن العيب تكون غَلطان ومُكابر وزايد في الغلط.. كدا كتير يا بشر.

الغائب عُذرو معاهو مثل سوداني بديك في غيابك حق التبرير في الحضور.

عموماً.. ما تكتِّر العذر.. وما تكتِّر الغلط… وما تكتِّر غيابك دائماً عشان ما يبقى عادي.

روشتة عاطفية.. بعتذر لدكاترة بلادي.. جيشنا الأبيض عن كل شئ.. بعتذر.. ليكم شُكراً نبيلاً.. وجميلاً.. ووافر التجلة والاحترام والمَحَبّة.

ويا إنت… مُسامحك.. يا حبيبي.. قلبك عارفو أبيض كلك حُسن نِيّة……!!