المشية
كل زول عندو مشية خاصة بيهو… وبتميزو
في ناس من بعيد بتعرفهم بي مشيتهم… حتى لو ماشين بي ضهرهم.. بتقول داك فلان.
في ناس مشيتهم جادة زي الربورت… في ناس بجدعو يدهم اليمين أو الشمال.
في ناس خطواتهم طويلة… وفي ناس خطواتهم بطيئة وفي ناس مشيتهم سريعة وناس (دبويات) يصلوك براحة بعد زمن وزمن.
في الأفلام أبيض وأسود أفلام زمان يا فن… لما يجي سيد البيت داخل خطوتو تعلن عن جيتو… الطربوش والعصاية كلها مكملات للمشية والشخصية الصعبة تحديدًا.
في مشية حلوة فيها قدلة.. أو رقصة أو متناسقة مع شكل الزول وزنو وجسمو وراسو مكملات لبعض.
أكتر عداوة الشحم والمشية كلما زاد الحجم كلما صعب المشي.. قد يصرح بعض الخبراء النفسيين أن المشية لها علاقة بالأذن الموسيقية وإيقاعك وطريقة تعاملك مع المشاكل والحياة… من ضمن لغة الجسد التي تدل على جزء واضح من معالم شخصيتك المشية.
الرواشة ايضا تعرف بيها أحدهم من مشيتو فيقولو ليك فلان دا أروش شوف مشيتو كيف… بالله رواشة مشية غايتو مخير الله…
الأتر تعرف بيهو الزول أترو ورجلو الكانت في المكان.. حرامية كتار ساهم الأتر في معرفتهم واكتشافهم ودا فن أو موهبة وعلم وعندو ناس وممكن يدخل ضمن الفراسة والفهم العند بعض الناس أو هبات زايد ذكاء يساوي قصاص أتر.
المشية لو اخدتها ضمن مشوار في مشية بتعجبك وتمشيها لناس بعزوك وبحبو جيتك.
في مشية انت مجبور عليها… وفي مشية ضمن الواجب ولازم تمشيها
في مشية للدكاترَة … الجيش الأبيض اليومين ديل ما شاء الله
في مشية الضباط ودي الأشهر.
الكرش من معوقات المشي لأنها بتمشي قدامك… الكرعين.. أو الرجلين واحد من نعم الله الكتيرة علينا….
التحية والتقدير لمجموعة كرسي الفرح الأخ الشهم والجدع صدام الجزولي وعماد أبو سارة ومجموعة المبادرة كلهم ربي يكرمهم وتبرعات بتخص ذوي الهمم والوصول ليها وتفريحهم بي مشاركة المشية أو الحركة ي ااخ السودان خيرو كتير بي ناسو
المشية عندها علاقة بالزول وشخصيتو وطريقتو زي بصمة أو جينات مشايية مششششا مششا…
في ناس بقولو ليك ديل مشايين لو اتلفت ما بتشوفهم وأهلهم كلهم طوال ومشايين ودي (عين جاهزة).. وفي ناس تانين المشي بحرق الروح معاهم لو مشيت مرة بتكون آخر مرة… أما الكتاحتهم او عجاجتهم دي فوق وكرعين تراب الف ديل خليهم ساي
المشي جزء من عافية الروح.. بخليك تفكر كويس.. دورتك الدموية تمشي.. تحرق سكر.. وتعيد صياغة ترتيب بعض الأشياء بمصاحبة الروح……..
ويا انت…. يا مشاوووير المحبة..