المُهِم
الأهمية والزول على حسب أهميتو بتدِّيهو الأولوية.. في كل شئ
الأهمية.. بتحصل بالتّعامُل والاهتمام.. والريدة وبالحُب دا بتخصّص ليك، وقت ومشاعر وحاجات بتدِّيها ليك دُون غيرك.. إنت وبس.
في أهمية بتكسبها إنت بتعامل سَمح مع الناس، كرمك، اهتمامك بظرفهم ومُناسباتهم وأفراحهم وأحزانهم.. لدرجة لو إنت غبت الصغير والكبير بسأل عنك.
في ناس بعملوا لي نفسهم أهمية فارغة قدام الناس.. أنا في اجتماع.. بعاينو لي ساعتهم وهم بتكلموا معاك.. وتكون للأسف الساعة ما شغّالة حركات بس!!
في واحدين تانين لما يشوفوك جايي من بعيد، بعملوا بتكلموا بالتلفون لدرجة مرات الجرس بضرب في أضانهم يااااخ إنت وكت بتعمل كدا أرخي الجرس بعد الأهمية المصنوعة دي إنت ما حريف.. بالغت بوليغ!!
لكن بذات الوجه الآخر.. في ناس مُهمِّين، بالجد مشغولين ونفسهم يكونوا معاك.. ظروف الحياة لكن نقول شنو.. الناس ظروف.
في ناس مُهمِّين نُص نُص تامِّنها موية لكن على منو؟! حركات مكشوفة ما بتأكلك عيش.. في زول قال عيش يااااخ دا أهم منو.. رغم الظروف رغم الصفوف.
في ناس جاب أهميتهم قلبك.. شالهم بالريدة ختاهم جواك وبقوا ناس حلوين.. بكونوا يمكن أحلى ناس لقيتهم في الدنيا دي.. ناس كان ما ضربوا ليك بتضرب ليهم.. وكان ختُّوك في الانتظار بترجع ليهم.. يااااخ لو ختُّوا وضع الطيران البغيظ شديد بترجع ليهم.. ما بهمك!!
كان ما جوك بتمشي ليهم.. بتريدهم وعارفهم مشغولين وعارفهم مُهمِّين ومُقدِّر ظرفهم ود لا جفا لا زعل.. انشغال بسيط وحصل.
رُوشتة عاطفية.. الأهمية بيكسبها الزول بالعمل والنجاح والتعامُل..
ويا إنت… إنت المُهم والناس جميع ما تهمني.. وخايف تفُوت والسكة بيك ما تلمني!!