العِرفة

 

هي نوع من أنواع الاستنارة وهي استكشاف أمر ومعرفة مدى صدقه  أو كذبه.

وهُو مُشابه للبصيرة أو التبصُّر، فهو قيادة نحو ضوء المعرفة.. وهي فرعٌ من فروع العرف.. بمعنى فلان دا بعرف.. ودا شن عرفتو؟.. وأشهر عريفة ما بتعرف البصيرة أم حمد حين.. جاءوا ليها بي تور أدخل رأسو في برمة وبقي رأسو محشور، وقالوا لها شاوري علينا بما نفعل قالت: اضبحوا التور.. وبَعد ضَبح التور قالوا: والبرمة.. قالت كسروها.. أجي يا إخواني!

عرفة السواد والرماد إحدى عبارات الندم في…. وقد ترافقها سافّة التراب على عرفتكم.

وأشهر استنارة روحية للشيخ فرح ود تكتوك.. (المشي بالبيوت.. الكلام بالخيوط).. وهذا في ما يخص.. العربات والموبايلات.. أو السيارة والجوال.. أو التلفون.. والكارو.. ود بقودنا للعرفة الشهيرة من لم يملك كارو لا يملك قراره.

في ناس تجمعك بيهم عرفة وريد.

في معرفة تصحبها عبارة ليه ما ردتك من زمان.

أنا عشت من قبل غريب ما عرفت.. تقدير الزمن حياتي من قبلك دموع وأصحابي من قبلك شجن (فات الأوان محمد يوسف موسى وابن البادية) بجمالية لحن ترترااااا.. ياااخ مبالغة ثنائية اتعرفت بالإبداع وزيّها في…

الجابري وعبد الرحمن الريح ثنائية اتعرفت بالمكان والزمان حي العرب.. مبالغة وجمال.

إذن صديق أساسي للعرفة العُشرة.. فبالعُشرة وحدها تعرف جوانب خفية من شخصية الآخر الإنسان.

مواقف.. رجالة.. جدعنة.. كرم.. بخل.. شهامة.. نخوة.. حاجات تربطك بالناس.. تخليك معاهم على محكين يا قريب من قلبك.. يا كمان جدعتو وراك.

السفر.. والشغل واحد منهم بكشف ليك الزول على حقيقتو وبالذات.. صفاتو الجوه المدسوسة.. وبالذات بخلو.. وأنانيتو وبي أي موقف ممكن تغيِّر رأيك من الزول مدى العمر.

نتفق.. في معرفة بتسعدك.. وفي معرفة بتشقيك.

في ناس بتغيِّر شارعك عشانهم وفي ناس تتمنى يوم تلقاهم.. ياااخ رسالة في التلفون منهم بتسعدك.

والله معرفة الناس كنز بمعنى الناس معادن… والأيام بتكشف ليك منو الصادق ومنو الكذاب.. منو الذهب.. منو الألماظ.. لكن برضو ما تظلم الناس العرفتهم حلوة بي ناس كعبة.. لأنك بتكون ندمان إنو الناس العرفتهم حلوة أنك ما عرفتهم من أول ما أمك ولدتك…..

روشتة عاطفية العرفة بطارية المعرفة.

ويا إنت… الفيك اتعرفت!

مقالات ذات صلة

شاهد أيضاً
إغلاق
زر الذهاب إلى الأعلى