واتحدى كورونا
نسبة للظروف الحالية نرجو من الجميع قضاء وقت ممتع وصحي من أجل السلامة والوقاية.
وهذه هي روشتات ترفيهية لقضاء وقت سعيد
بالإضافة إلى استخدام كافة المعقمات ونظافة اليدين وربي يقينا ويقيكم.
اشترِ جريدة واقرأها كلها نحبذ تكون (الصيحة) من الصفحة الأولى للأخيرة.
أقعد مع زول براي مسافة كمامة وجونتي بينك وبينو واسمع كلامو كلووووو يا لطيف.
امشي في الكوبري مشوار من أولو لي آخرو وتعال راجع براك والله معاك.
في العزل المنزلي جيب مرايا وشاي ولا قهوة مدنكلات واقعد مع نفسك، حوارك انت وروحك دا بوديك لي قدام وتعرف التمام من الما تمام.. يا زول قدام.
فتش عن أبيخ زول في البيت وادي نفسك فرقة وكت بايخ وونسة بايخة.
ادي المرتب لي ناس بيتكم كلو وما يهمك الشهر بيتم وشهر الكورونا دا ما تعد نفقتو
لو في شجرة في بيتكم اقعد تحت في ضل نيم واتأمل الضل ورقراقو وقصرو وطولو.. ويا ضلنا المرسوم على رمل المسافة وشاكي من طول الطريق.. قول للبنية تحديداً….. بعد داك الكلام براهو بجي
الاستغفار.. الصلاة على النبي سبحتك الزيها رفيق منو
ونس مع شافع من البيت في الضحكة معاهو سعادة قلب
فتش عن هواية جواك ياهو دا وكتها جاء.
الكلمات المتقاطعة دي مبالغة بتمسك بيك زمن سعيد في خط أفقي وعرضي وانت قاعد في محلك.
اتعلم العزف علي آلة جواك بتحبها أكيد الموضوع دا لي قدام بمشي معاك.
خلي التلفزيون أسمع الراديو أو لو كنت من محبي التلفزيون شغل العكس تغيير ظريف.
أدي أضانك حقها ما في شئ مريح قدر القرآن الكريم.
قدر ما يصل زهجك حدو أقضي عليهو في وكتو.
اتحدى كل شيء.. المرض الفقر الملل.. غيّر حياتك وانتعش وخليها حلوة.
التحدي كلمة كبيرة للبيعرف يقبلوا ويعرف شروطو.. ما في مستحيل تحت الشمس ولذلك نقبل تحدي كورونا بالعافية بالدعاء بالوقاية نقضي عليها بإذن الله وتكون كورونا انتي جنيتي هي الجنت على نفسها بجيتها السودان.
ويا انت.. اتحدى العالم وأنا وياااااك