إسماعيل حسن  يكتب : المريخ عمل صااااااااااااااااالح

 

* أشجع المريخ والحمد لله، وأحبه من سويداء قلبي منذ أواخر الخمسينات…. ومنذ ذلك التاريخ، لا أغيب عن مشاهدة مباراة من مبارياته إلا نادراً…

* وتبقى الحقيقة التي تستحق أن أقرها هنا بـ(القلم المليان)، هي أن مريخ هذا العام، أمتع (مريخ جماعي) أشاهده في حياتي..

* مريخ يجمع لاعبوه في أدائهم كل عناصر الكرة المطلوبة…

* المواهب الفردية.. المهارات العالية.. القوة.. العزيمة.. الغيرة على الشعار.. والتعامل مع الكفر بكل رقة وأدب..

* داير كورة بي أخوي وأخوك بمتعوك… دايرها بي رجالة بأدبوك..

* حتى الاحتياطيين إذا لعبوا أساسيين، والأساسيون قعدوا احتياطيين، كلو واحد في فرقتنا الحالية..

* ده أحسن من ده..

* حقيقة لا أدري من أين أبدأ.. وماذا أكتب..

* فكأس الدوري أمس الأول، هو أول كأس بعد كورونا.. وأول كأس بعد كأس “كاس”.. وأول كأس بعد الثورة.. وأول كأس بعد رفع اسمنا من قائمة الدول الراعية للإرهاب.. وأول كأس بعد التطبيع….. ونحن طبعاً ملوك “الأول”… لأننا الأول..

* وللمعلومية….. منذ أن عرف السودان كرة القدم، جرت مباراتان فقط بين المريخ والهلال بدون جمهور… والاثنتان كسبهما المريخ..

* عظمة يا المريخ عظمة…. ماضي وحاضر..

* قلت لكم قبل فترة، إنه في هذا العام يملأ العين ويدفق.. وحرام يلعب في دوري الدفسي السوداني…

* تمريرات صاح… استلام صاحين… تهديف مركز… دفاع منظم… حارس بي عشرين..

* وتاني وعاشر وألف، أرجع وأقول… المريخ عمل صالح… وناسو ناس طيبين طيبة جد..

* ومتواضعين تواضع جد…

* لا بتاعين مشاكل.. لا بتاعين أوهام… ناس واقعيين جداً جداً..

* إيمانهم قوي، وثقتهم في الله لا تحدها حدود.. لذا قدر ما تظلمهم، وتكيد لهم، وتحاول أن تمكر بهم؛ لا تقدر عليهم..

* ولذا.. ربنا بيكرمهم من سنة تلتين لي يوم الليلة بالإنجازات والمعجزات والأرقام القياسية، والكاسات الجوية.. وكؤوس المناسبات واللعيبة الجد..

* ولذا… نحن بنحبو، ونحب البحبو..

* مباراة أمس الأول، كان بإمكان المريخ أن يكسبها بأكثر من خمسة أهداف، لولا أن أخذته الشفقة بالهلال.. فهو في النهاية حبيبه ورفيق دربه ووصيف دنياه..

* بعد نهاية المباراة كانت لي طلة سريعة على بعض القروبات الزرقاء… وبعض القروبات المختلطة….

* جنس بكاء..

* واحد فيهم سأل: هل يستحق جمال سالم 15 ألف دولار في الشهر.؟… قلت ليهو أبداً والله… قال لي إنت مالك؟؟ ضحكني جنس ضحك.. عرفتو عرفني بشمت فيهو..

* واحد تاني حنني عديل كده…. رسل الصورة بتاعة الوات ساب الفيها الدموع السايله ديك، وقال تاني ما ح يشجع الهلال..  قلت ليهو مرحب بيك في ديار الفرح… عمل رايح ما رد علي.. عرفت كلامو كلام زعل ساي..

* واحد تالت قال لو ما آخر الزمن جايبين فوزي عشان يغلب لينا المريخ بالكجور…. قلت ليهو احتمال جماعتك حاولوا مع الحكم ما لقوا طريقة، قالوا يشوفوا فوزي يمكن يغلبنا نفسات ساي..

* اللهم لا شماتة..

* ختاماً… تسلمت أمس حافزاً من رابطة قطر، لتسليمه مناصفة بين الحارس أبوعشرين إذا جدد عقده مع المريخ، وعماد الصيني باعتباره نجم مباراة السبت.. وسأقوم بتسليمه للنجمين اليوم أو غداً..

* شكراً رابطة قطر… شكراً أبو عشرين.. شكراً عماد الصيني… شكراً كل نجوم المريخ..

* وشكراً حكم المباراة النزيه الأمين الشجاع..

* وكفى.

 

انضم لقروب الصيحة على واتساب اضغط هنا

انضم لقروب الصيحة على واتساب اضغط هنا

انضم لقروب الصيحة على واتساب اضغط هنا


مقالات ذات صلة

زر الذهاب إلى الأعلى
error: عذرا المحتوى لا يمكن نسخه !!