قال إن علاقتهما عمرها 35 عاماً.. عاصم البنا يكتب عن الفنان ياسر تمتام

يتعافى هذه الأيام الفنان ياسر تمتام بمستشفى القلب بالخرطوم.. وفي محنته المرضية الراهنة.. وكنوع من الدعم النفسي.. كتب الفنان عاصم البنا هذه الرسالة لصديق عمره الفنان ياسر تمتام.. حيث كتب على صفحته بالفيس بوك هذه الكلمات (لما يكون زوول اخوك وصديقك وحبيبك وزميلك ما يربو عن ٣٥ سنة من عمرك منذ المرحلة المتوسطة (الثانوي العام) وبفقدك في كل شيء وبصبّح عليك يومي وبسأل منك وبتسأل عنه وما اندفقت بيناتكم موية زي ما بقولوا ٣٥ سنة من عمرك وعمرو.. وكل مرة ياسر تمتام اخوك يُمتحن ويمتحنك.. تفتكر ممكن يكون الألم قدر كيف؟ إذا تألم..

الزول دا أنا مسجل معاهو ٦١ أغنية للإذاعة السودانية غير الحفلات والعطلات والجمعات والمنتديات والجمعيات الأدبية لما كنا وكانت والفواصل المدارية. وأب روف.. ومحمد بشير عتيق، الله يرحمه وود البنا والف قصة وقصة مقدار الألم ما ليك براك يا صديقي واخوي الحبيب، وإننا لا نملك إلا أن نسأل الحق عز وجل أن يبعد عنك كل سوء وألم ويجعلها لك كفارة واجراً وعافية بها تطيب لك الدنيا وتمحو عنك خطاياها.

أشهد الله أنك جرستنا. وما بنتجرس إلا للغالين ربنا يواليك بالعافية يا حبيب وتمرق لينا سالم وتحافظ على نفسك ما عشانا بس.. عشان المعاك وكل البحبوك يا غالي.. أجر وعافية ما كان نفسي اكتب كدا، لكن عسى أن تجدك بخير يا رب.