المواصفات تطلق حملة توعية للمستهلكين

الخرطوم: الصيحة

في إطار الحملة القومية لتوعية المستهلكين في رمضان، قدمت الهيئة السودانية للمواصفات والمقاييس عددا من الموجهات والنصائح للمستهلكين.

الدكــوة (1)

لكل ست بيت: الدكوة غذاء لذيذ ومفيد ، كلنا بنحبها بس نصيحتي ليكي اصنعيها بي نفسك، أو تحت رقابتك الشخصية.. (خليكي حريصة).

الخضــر والفاكهــة (2)

تعرفوا يا مواطنين، الغذاء الطبيعي صمام أمان للمستهلك.. بس يا ريت ما نشتري الخضروات والفاكهة المفروشة على الأرض.. (خلوا بالكم شديد).

بطـــاقة البيــان (3)

أهم حاجة يا مواطنين وقبل ما تشتروا أي سلعة لازم تلاحظوا تاريخ الإنتاج والانتهاء للسلعة، وتقروا كويس بطاقة البيان الفيها.. (انتبهوا)!

حمل المواد الساخنة في الأكياس (4)

نصيحتي لكل المستهلكين، ما تشيلوا الفول وكل الأغذية الساخنة في أكياس البلاستيك.. كده خطر شديد على صحتكم.. وانته يا بتاع الدكان ما تبيعه في الأكياس (وصحتكم غالية علينا)..

مضافــات الأغــذية (5)

انتو عارفين يا مواطنين انو مضافات الأغذية دي عبارة عن ألوان صناعية ومنكهات ومواد حافظة.. استخدامنا العشوائي ليها.. فيهو ضرر كبير علينا (اعملوا حسابكم).

تكرار الزيت ممنوع (6)

لكل ست بيت ولأصحاب المطاعم وناس الطعمية والسمك نصيحتي ما تكرروا غلي الزيت أكتر من مرة.. لأنو ده بسبب أمراض كتيرة.. (احذروا).

اللحــوم والألبــان (7)

اللحوم والألبان أغذية مهمة وحساسة عشان كده ما تشتروا من اللحوم المعرضة للتلوث وكمان الألبان اشتروها في الصباح وأغلوها كويس واحفظوها في التلاجة.

التخــزين (8)

لكل تاجر وصاحب محل لازم تراعوا شروط التخزين والعرض والتّداول عشان السلعة ما تفقد قيمتها الغذائية.. وما تعرضوا المواد الغذائية في الشمس.. (صحتنا أمانة عليكم).

لعب الأطفــال (9)

لكل الأسرة الكريمة.. لعب الاطفال حاجة مهمة وضرورية بس لازم تكون آمنة ومناسبة للطفل وخلوا بالكم ما تشتروا المفرقعات والألعاب النارية والخطرة.. (أولادنا مستقبل بلادنا).

المستهلك الواعــي (10)

يجب على كل مستهلك إنو يعرف حقوقه كويس ويكون فاعلا في حماية المجتمع ويبلغ عن أي مخالفة للجهات المختصة.. حماية المستهلك مسؤولية الجميع.

معاً لأجل غذاء صحي وآمن.